काठमाडौं- नेकपा माओवादी केन्द्रको जारी केन्द्रीय समिति बैठकमा नेताहरूको जीवनशैलीलाई लिएर बहस भएको छ।

अध्यक्ष पुष्पकमल दाहाल प्रचण्डले पेश गरेको राजनीतिक प्रतिवेदनमाथि सोमबार भएको छलफलका क्रममा नेताहरूले नेतृत्वमा स्पष्ट विचार र राजनीतिक दृष्टिकोण खोजेका उपाध्यक्ष अग्नि सापकोटाले बताए।

‘स्पष्ट विचार र स्पष्ट राजनीतिक दृष्टिकोणको प्रष्टतासहित अगाडि बढ्नुपर्छ भन्ने सबैको भनाइ छ । हाम्रो जीवनशैली खुला पुस्तकको पाना जस्तो हुनपर्छ’, उनले बैठकमा उठेका कुराबारे भने, ‘नेताहरू पारदर्शी हुनुपर्छ । उच्च नैतिक चरित्र र सबैको विश्वास जित्ने खालको हुनुपर्छ भन्ने सबैको भनाइ आएको छ ।’

उनले बैठकमा अध्यक्ष पुष्पकमल दाहाल प्रचण्डसहित सबै नेता–कार्यकर्ताहरू श्रम र उत्पादनमा जोडिनुपर्ने कुरा उठेको बताए । ‘कम्तीमा पनि महिनामा तीन दिन अध्यक्ष पनि श्रममा जोडिनपर्छ भन्ने छ’, उनले भने, ‘बोल्ने सबैले दण्डहीनताको अन्त्य गरिनुपर्छ भन्नु भएको छ ।’

उनले आइतबारको बैठकमा विभिन्न अभियान चलाउने तयारी गरिएको बताउँदै सोमबार काँठको अभियानको कुरा नेताहरूले उठाएको जानकारी दिए ।

‘अब पार्टीलाई सडक र सदनसँग जोड्ने नीतिअनुसार प्रभावकारी बनाउनुपर्छ । सदन छिटोभन्दा छिटो आह्वान गर्न दबाब सिर्जना गर्नुपर्छ । अरु पार्टीसँग पनि कुरा गर्नुपर्छ भन्ने उठाउनु भएको छ’, सापकोटाले भने।

महाधिवेशनमा कसरी जाने भन्नेमा मत नमिलेको उनले बताए । ‘महाधिवेशनमा गर्नेमा सबैको सहमति छ । तर अभियानमा गएर या त्यसपछि मात्रै भन्नेमा अलमल छ । महाधिवेशनको मिति, कार्यतालिका अहिले नै तोकौँ भन्ने अधिकांशको भनाइ छ । कोहीले अहिले नै तोक्नु पर्छ भन्नु भएको छ। महाधिवेशनबारे मिश्रित कुरा आइरहेका छन्’, उनले भने ।