काठमाडौं- नेकपा एमालेको केन्द्रीय कमिटी बैठकमा नक्कली शरणार्थी प्रकरणमा हाल केन्द्रीय कारागारमा रहेका निलम्बित सचिव टोपबहादुर रायमाझीबारे प्रश्न उठेको छ ।

पूर्वमाओवादी पृष्ठभूमिका केही नेताले पार्टीमा उचित जिम्मेवारी नपाएको कुरा पनि उठाएका छन् । सोमबार च्यासलमा बसेको दोस्रो दिनको बैठकमा केन्द्रीय सदस्य परशुराम अधिकारीले पूर्वमाओवादी धारका नेताहरूलाई उपेक्षा गरिएको कुरा नेतृत्वसामु उठाए ।

उनले माओवादीबाट एमालेमा आएका नेताहरूलाई अन्यायमा पारिएको गुनासो गरे । पार्टी कमिटीका आकार पनि सानो हुन थालेको बताउँदै त्यो पनि गुटगत हुँदा समस्या भएको गुनासो राखेका हुन् ।

‘अध्यक्ष ओलीनिकट गुट छ, संस्थापनइतर पनि गुट छन् । माओवादी छाडेर एमालेमा आएकाहरूको कुनै गुटमा छैन,’ अधिकारीले आफ्नो समयमा भने, ‘माओ‌वादीबाट आएकाहरूले जिम्मेवारी पनि पाएनन्। त्यहीकारण कतिपय साथीहरू पूरानै घरतिर जान थाल्नुभएको छ ।’

आफ्ना कुरा राख्ने क्रममा अधिकारीले नक्कली भुटानी शरणार्थी प्रकरण पनि प्रवेश गराए । नक्कली भुटानी शरणार्थी प्रकरणमा निलम्बित सचिव रायमाझी २ वर्षदेखि जेलमा छन् ।

तर उक्त प्रकरणमा पक्राउ परेका कांग्रेस नेता तथा पूर्व गृहमन्त्री बालकृष्ण खाण केही समय जेल बसेर रिहा भइसकेका छन् ।

यसबारे पनि प्रश्न उठाएका अधिकारीले कांग्रेसले नेता खाणलाई छुटाउन सक्दा एमालेले रायमाझीलाई किन नछुटाउएको भनेर पनि नेतृत्वलाई सोधेका छन् ।

‘कांग्रेसले बालकृष्ण खाणलाई छुटायो, एमालेले टोपबहादुर रायमाझीलाई छुटाउन सकेन भनेर माओवादीले साथीहरूलाई उतै फर्काइ रहेको छ,’ अधिकारीले बैठकमा अगाडि भने, ‘रायमाझी दोषी भए जेलमै रहुन्, निर्दोष भए छुटाउनुपर्‍यो। यस प्रकरणको सत्यतथ्य कुरा बाहिर आउनुपर्छ ।’