काठमाडौं– संसदीय समितिको बैठकमा अभिव्यक्त गर्ने शब्दहरुमा नै सांसदहरु बीच मतान्तर देखिने गरेको छ ।

संसदीय समितिमा छलफलमा रहेका विधेयकहरुमा सांसदहरुले आफ्ना धारणाहरु राख्दा आफूले चाहेको शब्द राख्नुपर्ने अडान पनि राख्ने चलनले मतान्तर देखिने गरेको हो । बिहीबारको राज्य व्यवस्था तथा सुशासन समितिको बैठकमा यस्तो देखियो ।

समितिमा संघीय निजामती सेवा सम्बन्धि मूल बिधेयकमा दफाबार छलफल चलिरहेको छ । बैठकमा नेपाल कम्युनिष्ट पार्टीका सांसद झपट रावल र नेपाली कांग्रेसका सांसद दिलेन्द्र प्रसाद बडुको धारणामा मतान्तर जस्तो देखिएको हो ।

दुवै सांसदले ब्यक्त गरेका बिचारको अन्तर्य एउटै भए पनि आफूले प्रयोग गरेको शब्द नै विधेयकमा राख्नु पर्ने अडान देखियो । दुवै जना सांसदले राखेका विचार ऐनको प्रस्तावनामा के के कुरा राख्ने भन्नेमा केन्द्रित थियो ।

एकै अर्थ लाग्ने फरक-फरक शब्दको प्रयोग र आफूले प्रयोग गरेको शब्द नै विधेयकमा उल्लेख गर्नु पर्ने अडानले कहिलेकाहीँ व्यक्तिगत सवाल जवाफ पनि हुन पुगेको छ । शब्दलाई लिएर विवाद बढ्न थालेपछि समितिमा छलफालमा सहभागी भएका मन्त्रालयका पदाधिकारी पनि अलमलमा पर्ने गरेका छन् ।