काठमाडौं– नेपाल प्रहरीको महानगरीय अपराध महाशाखाको प्रहरी सहायक निरीक्षक (असई) हुँ भन्दै हप्ता असुली गर्ने २ जना व्यक्ति पक्राउ परेका छन् ।

पक्राउ पर्नेमा तेह्रथुमको आठराई गाउँपालिका–१ घर भइ काठमाडौंको सामाखुसी बस्ने २७ वर्षीय भक्त बहादुर लिम्बु र ताप्लेजुङको ताप्लेथोक घर भइ काठमाडौैंको सामाखुसी नै बस्ने ३१ वर्षी हिमाल लिम्बु छन् ।

उनीहरुलाई महानगरीय अपराध महाशाखाकै टोलीले काठमाडौंको ठमेल (क्षेत्रपाटी)बाट पक्राउ गरेको हो ।

प्रहरीका अनुसार भक्तबहादुर लिम्बुले काठमाडौंको स्वयम्भू बस्ने आनन्द छोरोदी (धर्म गुरु)लाई आफू अपराध महाशाखाको असई हुँ भन्दै धम्क्याएर रकम असुल गर्न खोजेका थिए ।

लिम्बुको धम्की पछि छोरोदीले अपराध महाशाखामा नै उजुरी गरेका थिए । अपराध महाशाखाले घटनाको अनुसन्धान गर्ने क्रममा भक्तबहादुर र हिमाल लिम्बुले अपराध महाशाखाको प्रहरी हुँ भन्दै अन्य व्यक्तिबाट पनि रकम असुली गरेको देखिएको छ ।

प्रहरीले दुवै जनामाथि थप अनुसन्धान भइरहेको जनाएको छ ।