चितवन- सौराहामा बिहीबारदेखि हात्ती तथा पर्यटन महोत्सव सुरू भएको छ ।

क्रिसमस तथा अंग्रेजी नयाँ वर्षको सन्दर्भमा क्षेत्रीय होटल संघ (हान) सौराहाले सन् २००५ देखि हात्ती महोत्सव गरिरहेको छ।

यो १८ औँ हात्ती महोत्सव हो । सौराहानजिकैको बाघमारा मध्यवर्ती सामुदायिक वनको चौरमा पुस १५ गतेसम्म महोत्सव हुने छ ।

महोत्सवमा हात्तीका विभिन्न खेल र मनोरञ्जनात्मक गतिविधि देखाउने गरिन्छ ।

उक्त महोत्सवका अवसरमा शुक्रबार हात्ती सुन्दरी प्रतियोगिता गरिएको छ। उक्त प्रतियोगितामा दर्जनभन्दा बढी हात्ती सहभागी थिए ।

हात्ती सुन्दरी प्रतियोगिताको उपाधि २५ वर्षीया ‘बिजुलीकली’ले जितेकी छन् ।

प्रतियोगितामा शृङ्गार, चालचलन, अनुशासन, आज्ञाकारी, हिँडाइको चाल, स्वास्थ्यलगायत उनी सर्वोत्त्कृष्ट हुँदै उपाधि जितेकी हुन् ।

तस्बिरहरू – नेपाल फोटो लाइब्रेरी