काठमाडौं- हङकङको यू-१९ टोलीलाई हराउँदै घरेलु टोली यू-१९ टोलीले तीन खेलको एक दिवसीय शृंखला क्लिनस्विप गरेको छ ।

शुक्रबार भएको तेस्रो तथा अन्तिम खेलमा हङकङको यू-१९ टिम १३० रनले पराजित भएपछि नेपालले सिरिज कब्जा गरेको हो ।

नेपालले दिएको २६६ रनको लक्ष्य पछ्याएको हङकङले निर्धारित ५० ओभरमा ९ विकेट गुमाएर १३५ रनमात्रै बनायो ।

हङकङका लागि प्रित म्यानगुकियाले अर्धशतकीय योगदान दिए । नटआउट रहेका उनले ८७ बलको सामना गरेर ५५ रन जोडेका । जुमा ७ चौका पनि थियो ।

त्यस्तै अब्दुर सामदले २३ र कप्तान शिव माथुरले १८ रन जोड्नुबाहेक अरुले दोहोरो अंक छोएनन् ।

बलिङमा नेपालका अभिषेक तिवारी र अफ्रुदिन रैनले समान २-२ विकेट लिए ।

राजेश बोहरा, दीपक सेरला, र सन्तोष यादवले समान एक-एक विकेट लिए। यसअघि माथिल्लो मूलपानी मैदानमा टस जितेर पहिले ब्याटिङ गरेको नेपालले २६५ रन बनाएको थियो ।

नेपालका लागि तीनजनाले अर्धशतक बनाए । सूर्यांशु कोइरालाले सर्वाधिक ६३ रन बनाए । सन्तोष यादवले ५३ र अभिषेक तिवारीले ५६ रन बनाए ।

९६ बल खेलेका सूर्यांशुले ८ चौका र १ छक्का हान्दा ४१ बलमा तिवारीले ४ चौका र २ छक्का प्रहार गरे । सन्तोषले पनि ४५ बलमा ५ चौका र १ छक्का हाने ।

नरेन भट्टले ३६ रन जोडेको खेलमा सोहिल कुँवरले १३ तथा राजेश बोहराले ११ र निरज यादवले ७ रन थपे । २१ रन नेपालले अतिरिक्त पायो । बलिङमा हङकङका डेनियल म्याप, पार्थ श्रीवास्तव, सयन पुरी र प्रित मान्गुकियाले समान २ विकेट लिए ।

लगातार दुई खेलमा जित निकाल्दै नेपालले ३ खेलको एक दिवसीय यू–१९ सिरिज जितिसकेको थियो । पहिलो खेलमा ३ विकेटको जित निकालेको नेपालले दोस्रो खेलमा हङकङलाई २२६ रनले हराएको थियो ।