काठमाडौं- नेपाल राष्ट्र बैंकको थापाथलीस्थित नवनिर्मित भव्य भवनबाट सेवा थालिएको छ। पुस १ गतेदेखि राष्ट्र बैंकले नयाँ भवनबाट सेवा सञ्चालन थालेको हो ।

यसअघि राष्ट्र बैंकको केन्द्रीय कार्यालय, बालुवाटारबाट सेवा दिने गरिएको थियो। केन्द्रीय बैंकको सम्पति तथा सेवा ब्यवस्थापन विभागअन्तर्गतका बैंकिङ विभाग र मुद्रा व्यवस्थापन विभाग अन्तर्गतका सम्पूर्ण सेवा मंगलबारदेखि थापाथलीस्थित नवनिर्मित भवनबाट सुरु भएको हो ।

उक्त भवन भूकम्पपछि पुरानै अर्थात् सिंहमहलकै पुरानै स्वरुपमा बनाइएको हो । यो भवन २ अर्ब २५ करोड लागतमा बनाइएको हो।

२०७२ सालको भूकम्पले भत्किएको भवन निर्माण सकिएसँगै सेवा पनि थालिएको हो । भूकम्पबाट ढलेको राणाकालीन भवनलाई हटाएर पुरानै शैलीमा नयाँ बनाइएको हो ।

राष्ट्र बैंकका अनुसार, सहरी विकास तथा भवन निर्माण विभागले ठेक्का लगाएर यसलाई बनाएका हुन् ।

२०७५ भदौ ११ गते निर्माण सम्झौता भएको यो भवन निर्माणको ठेक्का बिलिल कन्टेक जेभीलाई दिएको थियो।

सुरुमा ३० महिनामा निर्माण सम्पन्न गर्ने सम्झौता थियो । तर त्यसको दोब्बर समय लगाएर निर्माण गरिएको हो । सुरुमा लागत एक अर्ब ७७ करोड अनुमान गरेर ठेक्का लगाइएको थियो । तर यो भवन २ अर्ब २५ करोडमा तयार भएको हो ।

थापाथलीमा राष्ट्र बैंकको ४२ रोपनी ३ आना २ पैसा जग्गा थियो । यहाँको नयाँ भवनमा मुख्य बैंकिङ कार्यालय, हेल्थ क्लब, सेक्युरिटी ब्लक र चमेनागृह ब्लक छन्। मूल भवन ६ तले बनाइएको छ। बाहिरी भाग पुरानो राणाकालीन सिंहमहल जस्तै बनाइएको छ ।

तस्बिरहरू : नेपाल फोटो बैंक