काठमाडौं– अभिनेता आर्यन सिग्देल र मिरुना मगरको अभिनय रहेको चलचित्र ‘च च हुई’ मङ्सिर ६ गतेबाट दर्शकमाझ आउने भएको छ । चलचित्रमा पहिलो पटक आर्यन र मिरुना एकसाथ देखिदैछन् ।

साम्तेन भुटियाले निर्देशन गरेको चलचित्र रोमान्टिक कमेडी जनराको हो । निर्माण टिमले चलचित्रका केही तस्विरहरु सार्वजनिक समेत गरेको छ । जहाँ आर्यन र मिरुनाको रोमान्टिक अवतार देखाइएको छ ।

केही दिन अघि ‘सिल्की सिल्की बाल’ बोलको गीत सार्वजनिक गरेको निर्माण पक्षले चलचित्रको प्रचार प्रसारलाई निरन्तरता दिएको छ ।

मुस्ताङ्गको चुसाङ्गमा छायाँकन गरिएको गीतको सार्वजनिक तस्वीरमा आर्यन र मिरुनाको केमेष्ट्री गज्जबकै देखिएको छ । झन्डै एक साता लगाएर छायाँकन गरिएको गीतको कोरियोग्राफी शिशिर खातीले गरेका हुन् ।

गीतमा राजनराज शिवाकोटी र मेलिना राईको स्वर रहेको छ भने राजनकै संगीत रहेको छ । गीतमा राजनसंगै अमृत घोले लामा र श्याम लामिछानेको शब्द रहेको छ ।