काठमाडौं- सत्ताको नेतृत्व गरिरहेको नेकपा एमाले आगामी माघदेखि चैतसम्म तीन महिने अभियान चलाउने भएको छ ।

एमाले केन्द्रीय संगठन विभागद्वारा आयोजित ‘स्थानीय तहमा पार्टी कामका समस्या र समाधान’ विषयक दुई दिने राष्ट्रिय कार्यशाला गोष्ठीबाट यस्तो निर्णय भएको हो ।

संगठन विभागका सचिव माधव प्रसाद ढुंगेलका अनुसार राष्ट्रिय कार्यशाला गोष्ठीले राष्ट्रिय शक्ति निर्माणका लागि यस्तो निर्णय गरेको हो ।

‘यो राष्ट्रिय कार्यशाला निर्णयक राष्ट्रिय शक्ति निर्माणको लागि माघ देखि चैत्र सम्म ३ महिने ‘वडाकेन्द्रित अभियान’ सञ्चालन गर्ने संकल्प गर्दछ’, ढुंगेलले आइतबार साँझ जारी गरेको विज्ञप्तिमा भनिएको छ ।

राष्ट्रिय कार्यशालाले आधारभूत तहसम्म अर्थात् टोल-टोलसम्मै पार्टी कमिटी निर्माण गर्ने निर्णय पनि लिएको छ । ढुंगेलले बताएअनुसार सदस्यता विस्तार सँगसँगै ‘जनतासँग जनसंगठन अभियान’ सञ्चालन गर्ने संकल्प पनि कार्यशालाले लिएको छ ।

कार्यशालाले २०८२ को पार्टी सदस्यता नवीकरण २०८१ को फागुन र चैत्रभित्रै सम्पन्न गर्ने योजना बनाएको पनि जानकारी उनले दिएका छन् ।

कार्यशालाबाट २०८१ भित्रै सम्पूर्ण पार्टी सदस्यहरूलाई अनलाइनमा ल्याउने योजना बनाएको पनि उनले बताए । एमालेले यसअघि एमालेको सदस्यताको विवरण हेर्ने गरी मोबाइल एप्लिकेशन र अनलाइन पनि बनाइसकेको छ ।

यो कार्यशालाले आगामी २०८१ चैतसम्म ‘राष्ट्रिय युवा महोत्सव’ आयोजना गर्न पार्टी केन्द्रसँग आग्रह गरेको छ

यो कार्यशालाले पार्टी र नेतृत्वविरुद्धका षडयन्त्र र कु–प्रचार भइरहेको पनि जिकिर गरेको छ । अब उक्त कुराको जमेर प्रतिवाद गर्दै पार्टी नीति, नेतृत्व र राजनीतिक कार्यदिशालाई जनताबीच स्थापित गर्ने संकल्प कार्यशालाबाट भएको ढुंगेलले बताए।

कार्यशालामा प्रदेश, जिल्ला जनसंगठन र तोकिएका जनप्रतिनिधिसहित ३०० जनाको सहभागिता थियो । कार्यशालामा पार्टी अध्यक्ष तथा प्रधानमन्त्री केपी शर्मा ओलीले विशेष सम्बोधन गरेका थिए ।