चितवन- गृहमन्त्री रमेश लेखकले सहकारी प्रकरणमा राष्ट्रिय स्वतन्त्र पार्टीका सभापति रवि लामिछानेमाथि भइरहेको अनुसन्धानका क्रममा कुनै अमानवीय व्यवहार नभएको बताएका छन् ।

आइतबार चितवनको भरतपुरमा प्रेस युनियनको पत्रकार सम्मेलनमा बोल्दै गृहमन्त्री लेखकले पूर्वउपप्रधामनमन्त्रीसमेत रहेका लामिछानेप्रति सरकारको कुनै प्रतिशोध नरहेको दाबी गरे ।

उनले सहकारी ठगी प्रकरणमा कात्तिक २ गते पक्राउ परेर ३ गतेदेखि लामिछानेमाथि भइरहेको बताउँदै त्यसक्रममा कुनै अमानवीय व्यवहार नभएको जिकिर गरेका हुन् ।

उनले संसदीय छानबिन समितिको प्रतिवेदनका आधारमा सहकारी प्रकरणमा राज्यका निकायले अनुसन्धान गरिरहेको बताए ।

कानुनअनुसार भइरहेको अनुसन्धानमा प्रश्न उठाउनु अनुसन्धानलाई प्रभावित गर्ने काम मात्रै भएको लेखकले उल्लेख गरेका छन् ।

लेखकले मुलुकलाई दिगो शान्ति, सुशासन, विकास र समृद्धि तर्फ अघि बढाउन ठूला दलहरू एकभएर सरकार बनाउनुपरेको बताए ।

सरकारको स्थायित्व कमजोर भएकाले देश झन्-झन् समस्यामा परेपछि स्थिरतातर्फ लैजाने एमाले–कांग्रेसको ध्येय रहेको  पनि उनले बताएका छन् ।

गृहमन्त्री लेखकले अहिलेको व्यवस्थालाई थप बलियो र सुदृढ बनाउन संविधान संशोधनको तयारी भइरहेको बताउँदै त्यसका लागि सबै दलसँग छलफल गरिने स्पष्ट पारेका छन् ।

उनले वर्तमान सरकार परिवर्तन हुने कुनै सम्भावना नभएको भन्दै २०८४ सालसम्म दुईदलीय सहमतिअनुसार अघि बढ्ने उल्लेख गरेका छन् ।