काठमाडौं– देशैभर अण्डाको मूल्यमा एकरुपता ल्याउन अण्डा उत्पादक संघले पहल गर्ने भएको छ । अण्डाको मूल्यमा एकरुपता नहुँदा किसान व्यवसायबाटै पलायन हुने अवस्था आएको भन्दै संघले मंगलबार काठमाडौंमा अण्डा उत्पादक किसान र वितरकबीच छलफल गरी पहल थाल्ने जनाएको हो ।

अहिले कृषकले पाउने मूल्य ठूलो अण्डाको प्रति क्रेट रु २५५ र मध्यम अण्डाको प्रति क्रेट रु १७० भए पनि ठाउँअनुसार मूल्य प्रति क्रेट ३० देखि ४० रुपैयाँ फरक रहेको संघको ठहर छ ।

देशैभर अण्डाको मूल्यमा एकरुपता ल्याउन वितरकलाई निश्चित कमिसन निर्धारण गर्न लागिएको अण्डा उत्पादक संघका केन्द्रीय अध्यक्ष शिवराम केसिले बताए । यता नेपाल अण्डा वितरक संघका महासचिव सूर्यमान शाक्यले भने ३ प्रतिशतभन्दा कम मुनाफामा अण्डा बिक्री वितरण गर्न नसकिने बताए ।

मकैको मूल्य वृद्धि भएको बहानामा दाना उद्योगले दानाको मूल्य बढाउँदा अहिले किसानले लागत अनुसारको अण्डाको मूल्य पाउन सकेका छैनन् । प्रति गोटा अण्डा उत्पादन गर्न १० रुपैंया लागत पर्ने भएपनि अहिले किसानले ८ रुपैंयाभन्दा बढी पाउन सकेका छैनन् ।