काठमाडौं – नेपाल प्रिमियर लिग (एनपीएल) अन्तर्गत शनिबारको पहिलो खेलमा पोखरा एभेन्जर्स र काठमाडौं गुर्खाजले प्रतिस्पर्धा गरिराखेको छ।

कीर्तिपुरस्थित त्रिवि क्रिकेट मैदानमा टस जितेर काठमाडौंका कप्तान करण केसीले पोखरालाई ब्याटिङको निम्तो दिएको खेलको १२ औं ओभरको समाप्तिमा काठमाडौंले चार विकेट हात पारेको छ। पोखराले चार विकेटको क्षतिमा ८१ रन बनाएर खेलिरहेको छ।

दोस्रो ओभरमा पहिलो विकेटको रुपमा एन्ड्रिज गौसलाई शून्यमै गुमाएको पोखराका लागि दिनेश खरेलले २५ बलमा ३८ रन बनाए। उनले ६ चौका र एक छक्का हिर्काए। कप्तान कुशल भुर्तेल भने १० बलमा सात रन बनाएर आउट भएका छन्। एनपीएलका कुनै पनि खेलमा कप्तान कुशल चलेका छैनन्। पोखराले चौथो विकेटको रुपमा अकर्षित गोमेललाई आठ रन बनाउँदा गुमाएको हो।

काठमाडौंका लागि राशिद खानले दुई विकेट हात पार्दा गेहार्ड इरासमस र माइकल लेविटले एकएक विकेट लिएका हुन्।

प्लेअफ दौडको कठिन मोडमा पुगेका काठमाडौं र पोखराको आजको खेललाई महत्त्वका साथ हेरिएको छ। एनपील तालिकामा पोखरा र काठमाडौंको समान चारचार अंक छ। आजको खेलमा पराजित टिम प्रतियोगिताबाट बाहिरिने पक्का छ भने विजयी टिमको प्लेअफ सम्भावना अन्य टिमको गतिमा भर पर्नेछ।

दुवै टिमले समान ५ खेल खेलिसकेका छन्। यी टिमको समानता भनेकै चार अंक जोड्दा दुई जित र तीन हार हो। आजको खेल सकिएपछि दुवै टिमले एकएक खेल खेल्न बाँकी हुनेछ। प्लेअफमा पुग्ने सम्भावना दरिलो बनाउन दुवै टिममाथि जित्नैपर्ने दबाब छ।

प्रतियोगितामा एक मात्र हार चाखेको जनकपुर १० अंकसहित शीर्ष स्थानमा हुँदा सुदूरपश्चिम आठ अंकसहित दोस्रो स्थानमा छ। कर्णाली आठ अंकसहित तेस्रो स्थानमा छ भने ६ अंक जोडेको चितवन चौथो स्थानमा छ। सुरुवाती खेलमा खराब देखिएको विराटनगर चार अंकसहित तालिकाको पाँचौं स्थानमा छ।

एनपीएल अन्तर्गत शनिबार दिउँसो भने चितवन र जनकपुर भिड्दैछन्। यो खेल देउँसो १ बजे सुरु हुनेछ।