काठमाडौं– राप्रपा (संयुक्त)को उच्चस्तरीय कार्य सम्पादन समिति बैठकले केन्द्रीय कार्य सम्पादन समिति बैठक लाई थप प्रभावकारी बनाउन सचिवालयलाई निर्देशन दिएको छ ।

अध्यक्ष पशुपतिशमशेर जवराको अध्यक्षतामा मंगलबार बसेको उच्चस्तरीय कार्यसम्पादन समिति बैठकले आगामी विहीबार र शुक्रबार बस्ने केन्द्रीय कार्य सम्पादन समिति बैठकलाई थप प्रभावकारी बनाउने विषयमा छलफल गरेको हो ।

बैठकमा अर्का अध्यक्ष डा. प्रकाश चन्द्र लोहनीद्वारा पेश गरिएको राजनैतिक कार्यपत्र सुझाव सहित अनुमोदन भएको छ ।

बैठकले पार्टीको संगठनिक गतिविधि, पार्टीले गर्न लागेको धार्मिक यात्रा, आन्दोलन एबं अभियानलाई उच्च मनोबलका साथ अगाडि बढाउने निर्णय गरेको प्रवक्ता रविन चाम्लिङले जानकारी दिए ।