काठमाडौं– नेकपा एकीकृत समाजवादीको स्थायी कमिटी बैठक आज पनि बस्दै छ । १२ बजेदेखि बस्ने बैठकमा नेताहरू केन्द्रीय कार्यालय आलोकनगरमा जम्मा भइरहेका छन् ।

आजको बैठकमा महासचिव धनश्याम भुसालले बुधबार आन्तरिक छलफलका लागि प्रस्तुत गरेको ‘आन्दोलनद्वारा पार्टी निर्माण’ शीर्षकको दस्ताबेजबारे छलफल हुने एजेन्डा छ ।

त्यसपछि पार्टीबाट ३० वटा विभागका प्रमुखहरूको टुङ्गो लगाइने उपाध्यक्ष जगन्नाथ खतिवडाको भनाइ छ ।

एकीकृत समाजवादीले ३० वटा विभागको जिम्मेवारी टुङ्ग्याउन सकेको छैन । सबै विभागको जिम्मेवारी बाँडफाँड गर्ने भन्दै समाजवादीले बुधवारदेखि दुई दिनसम्म पार्टीको स्थायी कमिटी बैठक राखेको थियो ।

बुधबार बैठकले स्थायी कमिटीमा १७ नेता थपेको छ । बैठकमा पार्टी महासचिव घनश्याम भुसालले प्रारम्भिक प्रस्ताव राखे  । उक्त प्रस्ताव अध्याय र छलफल गर्ने भन्दै बिहीबार नेताहरूले बैठक नै स्थगित गरेर विभागको जिम्मेवारीबारे आन्तरिक छलफल गरे । त्यसपछि आज र भोलिमा विभागका प्रमुखहरू टुङ्गो लगाउने तयारी छ ।

समाजवादीले पार्टीको दसैँ महाधिवेशनमा हारेका नेताहरूलाई पनि समेटेर विभागका प्रमुखहरू टुङ्ग्याउने तयारी गरेको छ ।