काठमाडौं – बेलायतका सांसदले बंगलादेशमा जारी हिन्दू धर्मावलम्बीमाथिको आक्रमणलाई ‘जातीय नरसंहारको प्रयास’ को संज्ञा दिएका छन् ।

कन्जरभेटिभ पार्टीका सांसद बब ब्लाकम्यानले बंगलादेशमा बसोबास गर्ने हिन्दू धर्मावलम्बीको घर जलाइएको, उनीहरुको व्यवसायलाई लक्षित गरी आक्रमण भएको र हिन्दू धर्मगुरुलाई पक्राउ गरिएको बताए ।

संसदीय बहसमा भाग लिँदै उनले बेलायत सरकारले बंगलादेशमा विकसित घटनाक्रमबारे के गरिरहेको छ भनेर प्रश्न समेत गरे । जवाफमा बेलायतकी हिन्द प्रशान्तमन्त्री क्याथरिन वेस्टले बंगलादेशमा जारी घटनाक्रमबारे त्यहाँको अन्तरिम सरकारका प्रमुख सल्लाहकार मोहम्मद युनुससँग छलफल गरेको बताइन् ।

टाइम्स अफ इण्डियाका अनुसार वेस्टले गत महिना युनुससँग भेटवार्ता गरेकी थिइन् । उनले आफ्नो सरकारले बंगलादेशमा गठित अन्तरिम सरकारको समर्थन गरिरहेको र बंगलादेश सरकारलाई कानुनी व्यवस्था बहाल गर्नेबारे सल्लाह दिन तयार रहेको स्पष्ट पारिन् ।