काठमाडौं – नेपाल बैंकर्स संघको नयाँ नेतृत्व चयनका लागि निर्वाचन हुने भएको छ । आगामी पुस ३ गते वार्षिक साधारणसभामा संघको अध्यक्ष चयनका लागि निर्वाचन हुने भएको हो ।

२० वटा वाणिज्य बैंकहरूको छाता संगठनको रूपमा रहेको संघको नयाँ अध्यक्षको लागि प्रभु बैंकका प्रमुख कार्यकारी अधिकृत अशोक शेरचन र माछापुच्छ्रे बैंकका प्रमुख कार्यकारी अधिकृत सन्तोष कोइरालाले उम्मेदवारी दर्ता गराएका छन् । उम्मेदवारी दर्ता गराउन दुई दिन समय बाँकी रहँदै शेरचन र कोइरालाले उम्मेदवारी दर्ता गराएका हुन् ।

शेरचन अहिले संघको कार्यसमिति सदस्यको रूपमा रहेका छन् भने कोइराला उपाध्यक्षको जिम्मेवारीमा छन् । १३ वर्ष अगाडि देखि यता संघको नेतृत्व आपसी सहमतिमा चयन हुँदै आएकोमा शेरचन र कोइरालाले उम्मेदवारी दर्ता गराएसँगै यस पटक नेतृत्व चयनका लागि निर्वाचन हुने संकेत देखिएको हो ।

 अध्यक्षमा उम्मेदवारी दर्ता गराए पनि निर्वाचन नगरी आपसी सहमतिमा नेतृत्व चयन गर्ने पहल गरिने कार्यसमितिका सदस्यहरूको भनाइ छ ।