काठमाडौं– जनता समाजवादी पार्टी, नेपालका अध्यक्ष उपेन्द्र यादवले कोरोनाका कारण बन्द भएका छोटी भन्सारहरू छिटो खुलाउन सरकारलाई सुझाव दिएका छन् ।

बुधबार बसेको प्रतिनिधिसभा अन्तर्गतको अर्थ समिति बैठकमा यादवले निकै राम्रो राजस्व हुने छोटी भन्सारहरू बन्द हुँदा सर्वसाधारणलाई समस्या भएको भन्दै छिटो खुलाउन सरकारलाई सुझाव दिएका हुन् ।

नेपाल–भारतका नाकाहरूबाट सानो मात्रामा सामान ल्याउने नागरिकले दुख पाएको र सेटिङमा सामान भित्र्याउनेहरूलाई सहज भएको उनले बताए ।

नाकाहरूमा राजस्व छली गरेर हुने पकेट भन्सार राम्रोसंग चलेको भन्दै उनले यसमा नियन्त्रण गर्न अर्थमन्त्रीको ध्यानाकर्षण गराए ।

उनले सीमा क्षेत्रमा रहेका नेपाली बजारहरूको कारोबार सुकेको र पारितर्फ भने बजार निकै चल्ने गरेको देखिएकाले यसले मुलुकको अर्थतन्त्रमा समेत असर पर्न सक्ने बताए ।