काठमाडौं– सत्तारुढ दल नेपाल कम्युनिस्ट पार्टी (नेकपा)का सचिवालय सदस्य वामदेव गौतम पार्टी अध्यक्ष तथा प्रधानमन्त्री केपी शर्मा ओलीलाई भेट्न सिंगापुर नजाने भएका छन् ।

हाल सिंगापुरमा उपचाररत रहेका प्रधानमन्त्री तथा नेकपा अध्यक्ष ओलीलाई भेट्न गौतम सहित महासचिव विष्णु पौडेल त्यहाँ जाने भन्ने विषय बाहिरिएको थियो ।

तर, गौतमका स्वकीय सचिव दीपक शर्माले भने उनको सिंगापुर जाने कार्यक्रम नरहेको जनाएका छन् ।

यद्यपि, नेकपा महासचिव पौडेल भने मंगलबार १ बजे सिंगापुर प्रस्थान गर्ने जनाइएको छ ।

महासचिव पौडेल प्रधानमन्त्री तथा पार्टी अध्यक्ष ओलीको स्वास्थ्य अवस्था बुझ्नका लागि भनेर सिंगापुर जान लागेका हुन् । मंगलबार त्यसतर्फ प्रस्थान गर्ने पौडेल प्रधानमन्त्री ओलीसँगै स्वदेश फर्किने जनाइएको छ ।

उपचारका लागि भनेर प्रधानमन्त्री ओली दोस्रो पटक भदौ ५ गते सिंगापुर गएका थिए । प्रधानमन्त्री ओलीको सिंगापुरस्थित नेशनल युनिभर्सिटी हस्पिटलमा उपचार भइरहेको छ ।