सुर्खेत- कर्णाली प्रदेशका स्याउ उत्पादन हुने जुम्लालगायत अन्य जिल्लामा ‘एक घर, एक स्याउ बगैँचा’ निर्माण गर्ने अवधारणा अघि सारिएको छ ।

कर्णाली प्रदेश सरकारका प्रवक्ता विमला केसीले प्रदेश सरकारले निर्यातमा जोड दिने नीति अनुरुप सो अवधारणा अघि सारिएको बताए ।
भूमि व्यवस्था, कृषि तथा सहकारीमन्त्रीसमेत रहेका केसीले भने, ‘यसका लागि प्रदेश सरकार लगानी गर्न तयार छ । विद्यालयदेखि सार्वजनिक जग्गामा सामूहिक स्याउ खेतीमा जोड दिन युवा प्रोत्साहन गर्ने योजना बनाइएको छ ।’

स्याउका बिरुवा रोप्नेदेखि व्यवस्थापन र जैविक विषादीको प्रयोग वृद्धितर्फ पनि प्रदेश सरकारले योजना बनाएको उनले बताए । सिँचाइ विना उत्पादन असम्भव भएको बताउँदै उनले कृषि मन्त्रालयले सिँचाइकै लागि भनेर रु। ५० करोड वजेट विनियोजन गरिएको बताए ।

उनका अनुसार कर्णाली प्रदेशका हरेक गाउँपालिकामा चिस्यान घर र जैविक विषादी उत्पादन गर्ने उद्योग स्थापनाको योजना निर्माण गरिएको छ ।