काठमाडाैं – बंगलादेशमा केही महिनाअघि भएको सरकार परिवर्तनसँगै त्यहाँका अल्पसङ्ख्यक हिन्दू धर्मावलम्बीलाई लक्षित गरी आक्रमणका घटना बढिरहेको भन्दै चिन्ता उत्पन्न भएका छन् । यसै सन्दर्भमा त्यहाँ हिन्दू धर्मसम्बद्ध इस्कोन संस्थामाथि प्रतिबन्ध लगाउने तयारी भइरहेको समाचार सार्वजनिक भएको छ ।

यद्यपि इस्कोनमाथि प्रतिबन्ध लगाउने योजनामा उच्च अदालतले अंकुश लगाइदिएको छ । ढाकास्थित उच्च अदालतले इस्कोनको गतिविधिमा प्रतिबन्ध लगाउन मागसहित दर्ता निवेदनलाई खारेज गरिदिएको हो ।

अदालतको आदेशपछि इस्कोनले एक विज्ञप्ति जारी गर्दै उच्च अदालतको उक्त फैसालको स्वागत गरेको छ । यो निवेदन बंगलादेशको सर्वोच्च अदालतका अधिवक्ता मोहम्मद मोनिर उद्दिनले दर्ता गराएका थिए । जसमा इस्कोनमाथि प्रतिबन्ध लगाउन माग गरिएको थियो ।

त्यसको एक दिनअघि बंगलादेशका महान्यायाधिवक्ताले अदालतलाई इस्कोनसँग सम्बन्धित कुनै पनि फैसला नलिन भनेका थिए । सरकारले इस्कोनबारे जरूरी कारबाही थालेको भन्दै महान्यायाधिवक्ताले यस्तो माग गरेका थिए ।

इस्कोनका प्रवक्ता राधारमण दासले समाचार एजेन्सी पीटीआईसँग भनेका छन्, ‘यो हाम्रा लागि ठूलो राहतको कुरा हो, बंगलादेशको उच्च अदालतले हामीमाथि प्रतिबन्ध गर्न दिइएको निवेदन खारेज गरिदिएको छ । तर उनले यस मामिलामा मोहम्मद युनुश नेतृत्वको वर्तमान बंगलादेशी सरकारको व्यवहार र नीतिलाई लिएर आफूहरू चिन्तित रहेको बताए ।