काठमाडौँ– जेलमा रहेका पूर्वप्रधानमन्त्री इमरान खानको समर्थनमा भएका प्रदर्शनका क्रममा भएको हिंसाको अनुसन्धान गर्ने पाकिस्तानी पत्रकार पक्राउ परेका छन् ।

लोकप्रिय युट्युब च्यानलका साथ टिभी च्यानल नियो न्युजका प्रस्तोता मतिउल्लाह जान र अर्का एक पत्रकारले इस्लामाबादको पीआईएमएस (पिम्स) अस्पतालमा मृतकको सङ्ख्या पुष्टि गर्न खोज्दा उनीहरूलाई पक्राउ गरिएको हो ।

पाकिस्तानी सञ्चार माध्यमका अनुसार उनीहरुलाई आतंकवाद विरोधी कानूनअन्तर्गत पक्राउ गरिएको हो । पूर्वप्रधानमन्त्री इमरान खानको तहरिक ए इन्साफ पार्टीका कार्यकर्ताले व्यापक प्रदर्शन गरेपछि राजधानी इस्लामावादको अवस्था तनावग्रस्त बनेको जनाइएको छ ।

प्रदर्शनलाई नियन्त्रणमा लिन सुरक्षाकर्मीले गोली चलाउँदा सुरक्षाकर्मी र प्रदर्शनकारी गरी दर्जनौँको ज्यान गएको छ । ठाउँठाउँमा भएको हिंसामा परी अरु कैयौँ घाइते भएका छन् ।