काठमाडौं– भौतिक पूर्वाधार तथा यातायातमन्त्री देवेन्द्र दाहालले आगामी १५ दिनभित्र मन्त्रालयअन्तर्गतका ठेक्काका आयोजना निर्माणको भुक्तानी गर्ने बताएका छन् ।

नेपाल पूर्वाधार पत्रकार समाजको आयोजनामा मन्त्रालयमा आयोजित कार्यक्रममा मन्त्री दाहालले आगामी १५ दिनभित्र सम्पूर्ण भुक्तानी गरिसक्ने दाबी गरे ।

मन्त्रालय मातहतका ठेक्का लागिसकेर अघि बढेको आयोजनाको भुक्तानी निर्माण व्यवसायीले पाउन सकेका छैनन् । मन्त्रालयका अनुसार, भौतिक मन्त्रालयअन्तर्गत३ अर्ब २१ करोड रुपैयाँ निर्माण व्यवसायीको बाँकी बक्यौता रहेको छ ।

यसअघि साउन महिनामै मन्त्रालयले निर्माण व्यवसायीको ५ अर्ब रुपैयाँ भुक्तानी गरिसकेको जनाएको छ । अघिल्ला वर्षको दायित्व अन्तर्गत रहेको ८ अर्ब ६६ करोड भुक्तानी बाँकी थियो ।

बाँकी ३ अर्ब २१ करोड रुपैयाँ मंसिर महिनाभित्रै हुने मन्त्री दाहालले बताए ।