काठमाडौं- भारतीय चर्चित क्रिकेटर शिखर धवन नेपाल आइपुगेका छन् ।

नेपाल प्रिमियर लिग एनपीएलमा कर्णाली याक्सको टीमबाट खेल्न उनी शुक्रबार साँझ काठमाडौं आइपुगेका हुन् ।

उनलाई कर्णाली याक्स टिमका अफिसियलहरूले त्रिभुवन अन्तर्राष्ट्रिय विमानस्थलमा स्वागत गरेका छन् ।

कर्णालीका अन्य विदेशी खेलाडीमा हङकङका बाबर हायात, वेस्टइन्डिजका चाडविक वाल्टन र ओमानका जीशान मकसुद छन् ।

उनीहरू तीनैजना नेपाल आइसकेका छन् । नेपाल क्रिकेट संघ (क्यान) को आयोजनामा शनिबारदेखि काठमाडौंमा नेपाल प्रिमियर लिग (एनपीएल) हुँदैछ ।

एनपीएलमा आठ फ्रेञ्चाइज टिम विराटनगर किङ्स, जनकपुर बोल्ट, चितवन राइनोज, काठमाडौँ गुर्खाज, पोखरा एभेन्जर्स, कर्णाली याक्स, लुम्बिनी लायन्स र सुदूरपश्चिम रोयल्सले उपाधिका लागि प्रतिस्पर्धा गर्नेछन् ।