काठमाडौं- निर्वाचन आयोगले कीर्तिपुर नगरपालिको उपनिर्वाचनमा मेयर पदका दुईजना उम्मेदवारलाई शुक्रबार स्पष्टीकरण सोधेको छ ।

आयोगले नेकपा (माओवादी केन्द्र) का उम्मेदवार प्रा.डा. शिवशरण महर्जन र स्वतन्त्र उम्मेदवार राजमान महर्जन (मानव) लाई स्पष्टीकरण सोधेको हो ।

दुवै उम्मेदवारले निर्वाचन आचारसंहिताविपरीतको कार्य गरेकाले स्पष्टीकरण सोधिएको आयोगका सूचना अधिकारी सुमन घिमिरेले खबरहबलाई बताएका छन् ।

आयोगका अनुसार दुवैजना उम्मेदवारलाई आयोगको अनुमगन टोलीले गरेको सिफारिसका आधारमा स्पष्टीकरण सोधिएको हो ।

दुवैजनाले मौनअवधिभन्दा अगाडि नै आचारसंहिता उल्लंघन गरेको आयोगले जनाएको छ । कीर्तिपुर नगरपालिकामा मंसिर १६ गते हुने उपनिर्वाचनमा १९ जना प्रतिस्पर्धामा छन् । त्यहाँ वडा नम्बर ४ र १ को अध्यक्षको पनि उपनिर्वाचन हुँदैछ ।