काठमाडौं- कीर्तिपुर नगरपालिकाको मेयर पदका लागि दलहरूले बिहीबार अन्तिम प्रचार गर्दै छन् । मध्यरातिदेखि शून्य समय सुरु हुने भएपछि दलहरू मतदाता रिझाउने अन्तिम प्रयासमा लागेका हुन् ।

यही प्रयासमा नेकपा माओवादी केन्द्रले पनि बिहीबार कीर्तिपुरमा चुनावी सभा गरेको छ । उक्त अन्तिम चुनावी सभालाई सम्बोधन गर्न अध्यक्ष पुष्पकमल दाहाल प्रचण्ड कीर्तिपुर पुगेका छन् । प्रचण्डसँग नेकपा एकीकृत समाजवादीका नेता राजेन्द्रप्रसाद पाण्डे पनि माओवादीको सभामा मिसिएका छन् ।

• कीर्तिपुरमा चार उम्मेदवारबीच टक्कर, ठूला दललाई स्वतन्त्रको चुनौती 

सभालाई सम्बोधनका लागि माओवादी उपाध्यक्ष अग्नि सापकोटा पनि पुगेका छन् । उनी केही दिनदेखि माओवादी उम्मेदवार डा. शिवशरण महर्जनलाई भोट माग्न कीर्तपुरमै खटिएका छन् ।

माओवादीले यस पटक नेकपा एकीकृत समाजवादीको साथ लिएर कीर्तिपुरमा प्राध्यापक डाक्टर महर्जनलाई मैदानमा उतारेको छ । ०७९ मा पनि माओवादीले उनैलाई टिकट दिएको थियो।

शिवशरणको साथमा माओवादी केन्द्र, एकीकृत समाजवादी र राष्ट्रिय स्वतन्त्र पार्टीलेसमेत रहेको नेताहरू बताउँछन् । यस्तै जसपाको असन्तुष्ट पक्ष र केही स्वतन्त्रका उम्मेदवारले पनि सघाइरहेको माओवादीको दाबी छ।

तस्बिरहरू : नेपाल फोटो लाइब्रेरी