काठमाडौं – साइबर अपराधको कसुरमा पक्राउ परेका भाइरल मेडिकल व्यवसायी दुर्गा प्रसाईं तत्काल थुनामुक्त नहुने भएका छन् । उनलाई थुनामुक्त गर्न माग गर्दै दायर बन्दीप्रत्यक्षीकरणको निवेदन सर्वोच्च अदालतले खारेज गरिदिएको छ ।

सर्वोच्चका न्यायाधीशद्धय महेश शर्मा पौडेल र नित्यानन्द पाण्डेयको संयुक्त इजलासमा पेशी चढेर सुनुवाइपछि सर्वोच्चले थुनामुक्त गर्न अस्वीकार गरेको हो ।

उक्त रिट खारेजीमा परेसँगै प्रसाईंको थुनामुक्त हुने बाटो बन्द भएको छ । रिट खारेज गरे पनि सर्वोच्चले प्रसाईंको स्वास्थ्य उपचार गर्न सरकारलाई निदेशनात्मक आदेश दिएकोछ ।

छोरा निराजन प्रसाईंले गृह मन्त्रालय, प्रहरी प्रधान कार्यालय नक्साल, केन्द्रीय अनुसन्धान ब्युरो लाजिम्पाट र काठमाडौं जिल्ला अदालतलाई विपक्षी बनाएर बन्दीप्रत्यक्षीकरण रिट हालेका थिए ।

यसअघि आइतबार जिल्ला अदालत काठमाडौंका न्यायाधीश कमला पौडेलको इजलासले प्रसाईंलाई थप पाँच दिन हिरासतमा राख्ने अनुमति दिइसकेको छ।

काठमाडौं अदालतले पनि प्रसाईं क्यान्सरका बिरामी भएकाले पचारको प्रबन्ध मिलाउन भनेको थियो । नेपाल प्रहरीको केन्द्रीय अनुसन्धान ब्यूरो (सीआईबी)ले प्रसाईंलाई गत मंसिर ४ गते क्तपुरस्थित निवासबाटै पक्राउ गरेको थियो ।

उनले प्रधानमन्त्री केपी शर्मा ओलीले कम्बोडियामा ३२ अर्ब रुपैयाँ लगानी गरेको गम्भीर आरोपसहित भिडियो बनाएर ‘फेक विवरण’ सार्वजनिक गरेपछि समातिएको हो ।

प्रसाईविरुद्ध यस पहिले पनि साइबर अपराधको मुद्दा चलिसकेको छ । त्यसबेला उनी एक लाख रुपैयाँ धरौटीमा रिहा भएका थिए ।