मोरङ- मोरङको उर्लाबारी-९ स्थित अल्पसंख्यक आठपहरिया समुदायले वाडाङमेट (मंसिरे चाड) मनाएका छन् । किरात आठपहरिया समाज मोरङ जिल्ला कार्यसमितिको आयोजनामा यो पर्व मनाइएको हो ।

वाडाङमेट आठपहरिया समुदायको मुख्य पर्व हो, जसलाई प्रत्येक वर्ष कात्तिक पूर्णिमादेखि सुरु गरी १५ दिनसम्म मनाइन्छ। यस पर्वका अवसरमा समुदायले पितृ पूजा, जन्म र मृत्युसँग सम्बन्धित विभिन्न संस्कार सम्पन्न गर्छन् ।

यस अवधिमा सुनसरीको बराह क्षेत्रमा वर्षभर मृत्यु भएका आफन्तको सम्झनामा दुःख बगाउने परम्परा छ। यस्तै, जेठो सन्तान प्राप्त भएको खुसियालीमा भोज खाएर खुशी साटासाट गर्ने परम्परा छ ।

मारुनी नाच, ढोल बजाउने, र मौलिक मुन्धुम गाउँदै उत्सव मनाउने परम्पराले समुदायलाई वर्षभरिको पीर मर्का बिर्साउने गर्छ। पर्व मनाउन टाढा भएका सदस्यहरू पनि घर फर्किने चलन छ ।

आठपहरिया समुदायका लागि वाडाङमेट धार्मिक र सांस्कृतिक दृष्टिले महत्वपूर्ण मानिन्छ। किरात आठपहरिया समाजका मोरङ जिल्ला अध्यक्ष हरि आठपहरियाका अनुसार यो पर्वले पितृपूजाका साथै वर्षभरिका दुःखलाई चोख्याउने, नयाँ घर निर्माणको शुद्धिकरण गर्ने, र पहिलो सन्तानको आगमनमा हर्षबढाइँ गर्ने परम्परा छ ।

यस पर्वमा कात्तिकको भाइटिकाको दिन जमरा राखेर देवी आह्वान गरिन्छ, र मंसिर औंसीसम्म विभिन्न विधि पूरा गरिन्छ ।

तेह्रथुमको पञ्चकन्यामा विष्णु भगवानले बराह अवतार लिएको किंवदन्ती यो पर्वसँग जोडिएको छ। बराहलाई समुदायले आफ्नो इस्टदेवी मार्गा थानीका दाजुको रूपमा पूजा गर्ने चलन छ। यस कारण आठपहरियाहरूले मार्गालाई आमा र बराहलाई मामाको रूपमा सम्मान गर्छन् ।

वाडाङमेट पर्वको अवसरमा माङकाटा (धामी) बाट जोखाना हेर्ने, शुभकार्यका लागि दियो बत्ती हेर्ने, ढोल झ्याम्टा बजाएर वढाङमी र मारुनी नृत्य प्रस्तुत गरिन्छ।

आदिवासी जनजातिमा सूचीकृत हुन माग गर्दै आएको आठपहरिया समुदायको यो चाड, सामाजिक, धार्मिक, र सांस्कृतिक महत्वका कारण विशेष मानिन्छ। यो समुदायले आफ्नो मौलिक संस्कृति र पहिचान जोगाउँदै निरन्तर पहिचानका लागि संघर्ष गर्दै आएको छ ।