जनकपुरधाम – नेपाली कांग्रेसका सभापति शेरबहादुर देउवाले वर्तमान सत्ता गठबन्धनमा कुनै खटपट नरहेको बताएका छन् । 

प्रजातन्त्र सेनानी अरविन्द ठाकुरको शालिक अनावरण गर्न जनकपुरधाम पुगेका देउवाले संघीय सरकारमा कुनै खटपट नरहेको बताएका हुन् । उनले यो गठबन्धन रहिरहने बताएका छन् । 

जनकपुर विमानस्थलमा सञ्चारकर्मीहरूसँग कुरा गर्दै पूर्वप्रधानमन्त्री देउवाले भने, ‘संघीय सरकारमा कुनै खटपट छैन । यो गठबन्धन रहिरहन्छ । मधेश प्रदेश सरकारको हकमा कांग्रेसको मात्रै निर्णयले पुग्दैन । अरु दलहरूले पनि निर्णय गर्नुपर्ने हुन्छ ।’

त्यस्तै उनले चिनियाँ परियोजना बीआरआईमार्फत अनुदान सहयोग मात्रै लिइने बताएका छन् । उनले बीआरआईमार्फत ऋण नलिएर अनुदानमा मात्रै सहयोग लिइने कांग्रेसको अडान रहेको स्पष्ट पारे ।

‘बीआरआई परियोजनामा हामी स्पष्ट छौं, ऋण होइन अनुदान लिनुपर्छ,’ कांग्रेस सभापति देउवाले भने, ‘बीआरआई परियोजनामा छलफल जारी छ, छिट्टै एउटा निष्कर्षमा पुगिन्छ ।’

उनले प्रधानमन्त्री केपी शर्मा ओलीको चीन भ्रमण फलदायी हुने पनि बताए । प्रधानमन्त्री ओलीको आगामी चीन भ्रमणमा बीआरआई कार्यान्वयन योजना सम्झौतामा हस्ताक्षर गर्ने कि नगर्ने विषयमा कांग्रेस र एमालेबीच समझदारी बन्न सकेको छैन । प्रधानमन्त्री ओलीले आगामी मंसिर १७ गतेदेखि चीन भ्रमण गर्दैछन् ।

यही भ्रमणका अवसरमा बीआरआई कार्यान्वयन योजना सम्झौतामा नेपाललाई हस्ताक्षर गराउन चीनले चाहिरहेको छ । तर यहाँका सत्तारूढ दलहरूबीच नै बीआरआई कार्यान्वयन योजना सम्झौताका विषयमा मत मिल्न सकेको छैन ।