सर्लाही– सर्लाहीमा स्थानीय सर्वसाधारणलाई पैसा ब्याजमा लगाई ठगी गर्ने श्यामकृष्ण साह परदेशीलाई प्रहरीले पक्राउ गरेको छ ।

नक्कली तमसुक बनाई सर्वसाधारणलाई ठगी गरेको विषयमा छानबिन गर्न प्रहरीले उनलाई मलंगवा नगरपालिका १० स्थित घरनजिकैबाट पक्राउ गरेको हो ।

उनले थोरै ऋण दिएर धेरै लिएको कागज गराई सोझासाझा स्थानीयबाट करोडौँ रकम ठगी गर्दै आएका थिए ।

तत्कालीन पिपरा गाविस स्थायी घर भई हाल मलगंवा नगरपालिका बस्ने उनले कम्तिमा ७५ हजार रुपैयाँसम्म ऋण दिएर ऋणीकै परिवारका सदस्यहरुलाई झुक्याएर, धम्क्याएर ९० लाखसम्मको कागजमा सहीछाप गराई पछि जबर्जस्ती असुलेर ठगी गरेको र नतिर्नेलाई मुद्दा हालेर दुःख दिने गरेका थिए । यसरी दुःख पाएपछि पीडित न्यायको खोजीमा काठमाडौं आएका छन् ।

स्थानीय ३ सय परिवारलाई ऋण दिन १ करोड जति लगानी गरेका कलवारले १ करोड २० लाख रुपैयाँ उठाइसकेका छन् । कागज गरिएअनुसार मिटर ब्याजको रकम ९ करोड बराबर पुगिसकेको छ । ऋण तिर्न नसक्दा गाउँ नै विस्थापित हुने अवस्था आएको पीडितहरु बताउँछन् ।
कतिपयले ऋण तिर्न नसकेर ज्यान गुमाएका छन् । पीडित परिवार समस्या बोकेर काठमाडौँ आएपछि सत्तारुढ दल नेकपाका प्रवक्ता नारायणकाजी श्रेष्ठ उनीहरुलाई न्याय दिलाउने प्रतिवद्धता जनाएका थिए ।