काठमाडौं- जनता जगाउन भन्दै सरकारको नेतृत्व गरिरहेको नेकपा एमाले सडकमा निस्किँदा काठमाडौंको सवारी व्यवस्थापन अस्तव्यस्त भएको छ ।

गत असार ३० गते चौथो पटक प्रधानमन्त्री भएका केपी शर्मा ओली नेतृत्वको सरकारले जनचाहनाअनुसारको परिणाम दिन नसकेको भनेर चर्को आलोचना भइरहँदा प्रतिरक्षाका लागि एमाले सडकमा उत्रिएको हो ।

एमालेलले शुक्रबार काठमाडौंको दरबारमार्गमा जागरण सभा नाम दिएर कार्यकर्ता उतार्दै गर्दा बिहानैदेखि आसपासका मुख्य चोकमा सवारी व्यवस्थापन अस्तब्यस्त भएको छ।

अनामगरदेखि दरबारमार्गसम्म आइपुग्नै ४५ मिनेट बढी समय खर्चिनुपरेको छ। एमालेको जागरण सभाले लैनचौर, ठमेल, अनामनगर, माइतीतघर , ज्ञानेश्वर, मैदीदेवी, नक्साल, लाजिम्पाटसहितका मुख्य क्षेत्रको सवारी अस्तब्यस्त भएको हो ।

नारायणहिटी संग्रहालयअगाडि दरबारमार्गको मुख्य सडक छेकेर एमालेले सभा गर्न लागेपछि ट्राफिक प्रहरीलाई आसपासको सवारी व्यवस्थापन मिलाउन मुस्किल परेको छ ।

तस्बिरहरू : केशव सावद/विजय देवकोटा