काठमाडौं- नेकपा एमालेका महासचिव शंकर पोखरेलले जनतालाई आशावादी बनाउन जरुरी रहेको बताएका छन् ।

यही मङ्सिर ७ गते काठमाडौंमा गर्न लागिएको जागरण सभाबारे एमालेले शुक्रबार पार्टी केन्द्रीय कार्यालयमा राखेको पत्रकार सम्मेलनमा पोखरेलले यस्तो बताएका हुन् ।

उनले जनतालाई आशावादी बनाउन समाजमा देखिएको अराजकता चिर्न आवश्यक रहेको पनि बताएका छन् ।

जनता असन्तुष्ट छन् भनेर गरिएको प्रचारलाई चिर्न जागरण सभा गर्न लागिएको उनले जानकारी पनि दिएका छन् ।

‘जनता प्रमुख दलप्रति नै विश्वास र भरोसा गर्छन् । उनीहरूबाट नै सुधारको अपेक्षा गर्दछन् भन्ने सन्देश दिन जरुरी छ, त्यो हिसाबले जागरण सभा गर्दैछौँ’, उनले भने ।

पोखरेलले जनताको बिचमा जाने कुरा रक्षात्मक नहुने उनले बताए । राजनीतिक दल सधैँभरि जनताको बीचमै जानु पर्ने उनले बताए । त्यही धारणाअनुसार जनताको बीचमा जाने एउटा माध्यम जागरण सभा भएको पोखरेलले बताएका छन् ।

एमाले काठमाडौं, ललितपुर र भक्तपुर जिल्ला कमिटीहरू मुख्य आयोजक, विभिन्न जनसंगठन, पेसागत संगठन, सम्पर्क समन्वय कमिटी र विभागको सहभागितामा मङ्सिर ७ गते काठमाडौंमा जागरण सभा हुँदैछ ।

पत्रकार सम्मेलनमा वर्तमान सन्दर्भमा जनताबीचमा पार्टीको दृष्टिकोण र मान्यता स्पष्ट गर्न जरुरी भएकोले जनजागरण सभा आयोजना गर्न लागिएको जानकारी आयोजकले दिएका छन् ।