काठमाडौं– ट्राफिक प्रहरीले पछिल्लो समय यातायातसम्बन्धी नियम नमान्ने सवारी तथा सवारी चालककको हकमा सक्रियता बढाएको छ ।

मादक पदार्थ सेवन गरेर सवारी चलाउने यात्रुका लागि निकै कडाइ गरेको ट्राफिक प्रहरीले पछिल्लो समय लेन मिच्ने र जथाभावी पार्किङ गर्नेमाथि पनि कारबाही तीब्र बनाएको छ ।

कसैले लेन मिचेमा सीसी क्यामेराको सहायतामा ट्राफिक प्रहरीले सवारी नम्बर पहिचान गरी कारबाही गर्ने गरेको छ ।

यसअघि भीआईपीलाई ट्राफिक प्रहरीले कारबाही नगर्ने गरेकोमा पछिल्ला दिनमा मन्त्री तथा सरकारी कर्मचारीले समेत छुट पाएका छैनन् ।

केही दिन अघि मात्र भौतिक पूर्वाधार तथा यातायातात मन्त्री रघुविर महासेठ चढ्ने बा २ झ ४८६२ नमरुको झन्डावाला गाडी ट्राफिक प्रहरीको कारबाहीमा परेको थियो । गाडीका चालक शिवराम थापाको लाइसेन्स लिएर १ हजार रुपैयाँ जरिवाना गराएर गाडी छाडिएको छ ।

त्यस्तै असार ११ गते अनधिकृत रुपमा पार्किङ गरिएको गृह मन्त्रालयका एक उपसचिवको गाडीमा ट्राफिक प्रहरीले ह्वील लग गरेको थियो । बा २ झ ४३८८ नम्बरको गाडीमा सिंहदरबार नजिकै ट्राफिक प्रहरीले ह्वील लक गरेको थियो ।