काठमाडौं- प्रधानमन्त्री केपी शर्मा ओलीले देशलाई कसैले पनि ब्याक गेयरमा फर्काउन नसक्ने बताएका छन् ।

कान्तिपुर कन्क्लेभ २०२४ को समापन सत्रको परिसंवादलाई बिहीबार सम्बोधन गर्दै ओलीले यस्तो बताएका हुन् ।

ओलीले आफूहरूलाई गाली गर्नेलाई टुप्पाबाट पलाएकाहरूको संज्ञा पनि दिएका छन् ।

‘देश ‘ब्याक गेयर’ लगाएर पछाडि फर्किन सक्दैन’, ओलीले सम्बोधनका क्रममा भने, ‘नयाँ पुस्ताका नाममा टुप्पाबाट पलाएकाहरूले तथ्यहीन आधारमा गाली गरेको सुहाउँदैन ।’

ओलीले राष्ट्रिय स्वतन्त्र पार्टीका सभापति रवि लामिछाने पक्राउ परेपछि अदालतलाई दबाब दिने काम भएको पनि बताएका छन् । रास्वपाले पोखरा र रुपन्देहीमा गरेको प्रदर्शनलाई लिएर उनले यस्तो भनेका हुन् । ‘न्यायालयको कामलाई दबाब र झूठको प्रचारबाट प्रभावित पार्न खोज्नु उचित होइन’, उनले भने ।

यसअघि रास्वपाले अदालतमा पुगिसकेको मुद्दालाई प्रभावित पार्न प्रदर्शन गरेको भन्दै उक्त पार्टीका नेताहरूविरुद्ध सर्वोच्च अदालतमा रिटसमेत दायर भएको छ । अदालत प्रशासनले दरपीठ गरेको उक्त रिट दर्ता भएर अब सुनुवाइमा जाँदैछ ।