काठमाडौं- प्रधानमन्त्री केपी शर्मा ओलीको चीन भ्रमणको तयारी भइरहेका बेला द्विपक्षीय संवाद तीव्र भएको छ।

गत असार अन्तिममा प्रधानमन्त्री भएपछि उत्तरी छिमेकी चीनको भ्रमणमा जाने तयारीमा रहेका प्रधानमन्त्रीको भ्रमणबारे दुवै पक्ष छलफलमा जुटेका हुन् ।

यही क्रममा नेपालका लागि चिनियाँ राजदूत छन सोङले परराष्ट्रमन्त्री डा. आरजु राणा देउवासँग सोमबार सिंहदरबारमा भेटवार्ता गरेका छन् ।

राजदूत सोङ परराष्ट्र मन्त्रालयमा पुगेर मन्त्री राणासँग संवाद गरेका हुन् । दुईजनाबीच प्रधानमन्त्री ओलीको आसन्न चीन भ्रमणबारे कुराकानी भएको छ ।

प्रधानमन्त्री ओलीको चीन भ्रमणको संयोजनको जिम्मा पनि मन्त्री राणाले पाएकी छन् । प्रधानमन्त्री ओली आगामी मंसिर १७ गते चीन जाने मिति तय भएको छ ।

ओलीको चीन भ्रमण तयारी भइरहेका बेला बेल्ट एन्ड रोड परियोजना (बीआरआई) अघि बढाउने नबढाउने विषयमा सत्तारुढ दलहरूबीच सहमति जुटिसकेको छैन । ओली अहिले बीआरआई अघि बढाउने कुरामा कांग्रेसलाई मनाउन सक्रिय छन् ।