पर्वत- नेपालका लागि‌ चिनियाँ राजदूत छन सोङले ‘द क्लिफ नेपाल’को अवलोकन भ्रमण गरेका छन् ।

राजदूत छनसहितको टोलीले शुक्रबार साहसिक पर्यटनको हब क्लिफ पुगेको कम्पनीका अध्यक्ष राजु कार्कीले जानाए ।

क्लिफको अवलोकनपछि राजदूत छनले क्लिफका साहसिक गतिविधिमा रमाउन मन भए पनि समयका कारण सम्भव नभएको बताए । त्यसका लागि अर्को पटक क्लिफ आउने उनले बताए ।

राजदूत छनसहितको टोलीको भ्रमणले कम्पनी र कर्मचारीलाई नयाँ ऊर्जा मिलेको अध्यक्ष कार्कीले बताए । भ्रमणमा गण्डकी प्रदेशका पूर्वपर्यटन मन्त्री विकास लम्साल लगायत थिए ।

राजु कार्कीको परिकल्पना र नेतृत्वमा कालीगण्डकी नदीको खोँचमाथि पर्वत र बागलुङको बलेवा जोड्ने गरि बनाइएको द क्लिफमा विश्वकै दोस्रो अग्लो बञ्जी जम्प सञ्चालनमा छ ।

पछिल्लो समय एडभेञ्चर हबको रुपमा विकास हुँदै गएको द क्लिफमा खेल्न देश विदेशबाट साहसिक पर्यटनका पारखी आउने गरेका छन् ।

यसअघि द क्लिफमा विभिन्न मन्त्री तथा‌ सरकारका पदाधिकारीहरूले अवलोकन भ्रमण गरिसकेका छन् ।