काठमाडौं– आईसीसी यु– १९ महिला विश्वकप टी–२० क्रिकेटको एसिया छनोट अन्तर्गत आज नेपालले आफ्नो दोस्रो खेलमा कुवेतसँग प्रतिस्पर्धा गरिरहेको छ ।

संयुक्त अरब इमिरेट्स (युएई) को द सेभेन क्रिकेट रङ्गशालामा जारी खेलमा नेपालले टस जितेर कुवेतविरुद्व ब्याटिङ गरिरहेको छ ।

हिजो सुरु भएको प्रतियोगितामा नेपालले आफ्नो पहिलो खेलमा थाइल्याण्डलाई ६७ रनले पराजित गर्दै विजयी सुरुवात गरेको छ।

यस्तै, कुवेत र युएईबीच भएको पहिलो खेलमा युएईले १०६ रनको अन्तरले कुवेतलाई हराएको थियो ।

कात्तिक २९ गतेसम्म चल्ने प्रतियोगितामा आयोजक युएईसहित नेपाल, कुवेत र थाइल्याण्ड सहभागी छन् ।

नेपालले तेस्रो खेल शनिबार घरेलु टोली युएईसँग खेल्नेछ भने कात्तिक २५ गते थाइल्याण्डसँग प्रतिस्पर्धा गर्नेछ । यसैगरी कात्तिक २७ गते कुवेत र कात्तिक २८ गते युएईसँग खेल्नेछ ।

प्रतियोगितामा सहभागी चार टोलीमध्ये शीर्ष स्थान हासिल गर्ने टोली विश्वकपमा छनोट हुनेछ । विश्वकप क्रिकेट प्रतियोगिता अर्को वर्ष मलेसियामा आयोजना हुँदैछ ।