काठमाडौं– राष्ट्रिय स्वतन्त्र पार्टी (रास्वपा)ले भोलि (बिहीबार) देखी स्थानीय तहको उपनिर्वाचन हुने क्षेत्रमा उम्मेदवारको दरखास्त  दिन आव्हान गर्ने भएको छ । 

केन्द्रीय निर्वाचन संयोजन समितिमा संयोजक तथा रास्वपा सांसद गणेश पराजुलीका अनुसार समितिले भोलि सात वटै प्रदेशका सम्बन्धित जिल्ला र पालिकामा उम्मेदवार आव्हान गर्न अनुरोध गर्ने भएको छ ।  

‘उम्मेदवार आव्हान भएपछि इच्छुक साथीहरूले आंकक्षा राख्नुहुन्छ । त्यसपछि निर्वाचन परिचालन समिति र प्रदेश जिल्लाका नेताहरू बसेर कहाँ कसलाई उठाउने कसरी मिलाउने भन्ने छलफल हुन्छ । पराजुलीले खबरहबलाई भने, ‘सहमति नभएको अवस्थामा प्राइमरी कलेक्सन पनि हुन सक्छ ।’ 

पराजुलीका अनुसार स्वतन्त्र व्यक्ति बाहेक अरु पार्टीसँग रास्वपाले सहकार्य गर्ने छैन । 

निर्वाचन आयोगमा अनुसार हालसम्म ४१ स्थानमा निर्वाचन हुँदै छ । तर रास्वपाले ३९ स्थानमा मात्र उम्मेदवार दिन पाउँछ । दुई स्थानमा जिल्ला समन्वय समितिको निर्वाचन हुने भएकाले पहिलो पटक स्थानीय तह निर्वाचनमा होमिएको रास्वपाले सो क्षेत्रमा उम्मेदवारि दिन पाउँदैन । 

रास्वपाले पहिलो पटक ०७९ को निर्वाचनमा प्रतिनिधि सभामा उम्मेदवार दिएको थियो । अहिले तिन तहको संरचना मध्ये रास्वपाको  प्रतिनिधि सभामा मात्र २१ सिट छ । प्रदेश र स्थानीय तहमा सहभागिता शून्य छ ।  

स्थानीय तहमाको केन्द्रीय निर्वाचन संयोजन समितिमा संयोजक पराजुलीसहित सांसदहरू शिशिर खनाल, हरि ढकाल, निशा डाँगी, विन्दवासिनी कम्साकार छन् । यस्तै कोषाध्यक्ष लिमा अधिकारी, केन्द्रीय सदस्य गणेश कार्की, विजय जैरु र कमल सुवेदी पनि सो समितिमा छन् ।

 उनीहरूले उम्मेदवारको अन्तिम टुङ्गो लगाउने तथा ठाउँ ठाउँमा जिम्मेवारी लिएर निर्वाचनको तयारी गर्ने छन् । त्यसबाहेक प्रदेश र जिल्लामा पनि निर्वाचन परिचालन समिति बन्ने संयोजक पराजुलीको भनाइ छ ।