काठमाडौं –  काठमाडौं जिल्ला अदालतले चलचित्र निर्माता तथा वितरक गोविन्द शाहीलाई थप ७ दिन हिरासतमा राख्न अनुमति दिएको छ । अदालतले यसअघि दुईपटक अनुसन्धानका लागि भन्दै २/२ दिन थप गरी अनुसन्धानका लागि हिरासतमा राख्न अनुमति दिएको थियो ।

महानगरीय प्रहरी परिसर काठमाडौंका प्रवक्ता प्रहरी नायव उपरीक्षक कृष्णकुमार चन्दका अनुसार उनीमाथि थप अनुसन्धान भइरहेको छ । पक्राउ परेका निर्मातालाई  चलचित्र ‘लिलिबिली’ बाट प्राप्त नाफा नदेखाएको भन्दै चलचित्रका निर्माता सुदीप खड्काले उजुरी दिएका थिए ।

निर्देशक मिलन चाम्स र निर्माता सुदीप खड्काले शाहीले फिल्मको नाफा हिनामिना गरेको आरोप लगाउँदै आएका छन् । तर,  शाहीले भने आफूले हिनामिना नगरेको बरु उल्टो आफूले लिन बाँकी रहेको दाबी गर्दै आएका छन् ।

शाहीलाई निर्माता खड्काले गतवर्ष नै उजुरी दिए महानगरीय प्रहरी महाशाखाको टोलीले भदौ ४ गते प्रकाउ गरेको थियो ।

अपराध महाशाखाले शाहीमाथि थप अनुसन्धानका लागि शुक्रबार महानगरीय प्रहरी परिसर काठमाडौंको जिम्मा लगाएको थियो । त्यसपछि परिसरले २ दिन म्याद थप गरी अनुसन्धान थालेको थियो ।