काठमाडौं– संघीय सरकार तथा ७ प्रदेशका वरिष्ठ अधिवक्ताहरु सम्मिलित १२ सदस्यीय प्रतिनिधिमण्डल भारतको भ्रमणमा रहेको छ ।
महान्यायाधिवक्ता अग्नि खरेल नेतृत्वको टोली गत भदौ ८ गते भारत भ्रमणमा निस्किएको हो ।

साताव्यापी भ्रमणमा निस्किएको टोलीको प्रमुख उद्देश्य भारतको महान्यायाधिवक्ता र राज्यका महाधिवक्ताबीचको सम्बन्ध प्रगाढ बनाउनुका साथै केन्द्रीय र राज्य न्यायिक प्रणालीबीचको सम्बन्ध बारे अध्ययन गर्ने रहेको छ ।

महान्यायाधिवक्ता खरेलले गत मंगलबार मात्रै भारतीय समकक्षीसँग भेटवार्ता गरी आपसी हितको विषयमा छलफल गरे ।

त्यसैगरी टोलीले भारतको सर्वोच्च अदालत, दिल्ली उच्च अदालतको भ्रमण गर्नुका साथै नयाँ दिल्लीस्थित भारतीय विधि संस्थानमा एक दिने कार्यशालामा समेत भाग लिएका छन् ।

प्रतिनिधिमण्डलले शनिबारसम्म गुजरातको भ्रमण गर्ने कार्यक्रम छ । भ्रमणका क्रममा गुजरात उच्च अदालतको भ्रमण गरी त्यहाँका महाधिवक्तासँग भेटघाट गर्नुका साथैे गान्धी नगरस्थित गुजरात फोरेन्सिक विज्ञान विश्वविद्यालयमा (जीएफएसयु) एक दिने कार्यशालामा भाग लिएर स्वदेश फर्किनेछ ।