काठमाडौं – भोलि शुक्रबारदेखि नेपाली चलचित्र ‘मारुनी’ प्रदर्शनका क्रममा छ । यही मितिमा चलचित्र ‘कबड्डी ३’ पनि प्रदर्शन हुने भनिएको थियो । तर, हिन्दी चलचित्र ‘साहो’ रिलिज हुने भएपछि यो फिल्म पछि हटेको थियो ।

दुई नेपाली फिल्मको एकसाथ टक्कर पर्ने अवस्था त ‘कबड्डी ३’ सरेपछि ट–यो । तर ‘साहो’ ले भने ‘मारुनी’ लाई पछार्ने देखिएको छ ।

नेपालमा मल्टिप्लेक्स हलमा प्रभास स्टारर फिल्म ‘साहो’ को आक्रामक बूकिङ खुलेको छ भने मारुनीले सीमित हल मात्र पाएको छ ।

सबैभन्दा बढी मल्टिप्लेक्स हल भएको क्युएफएक्समा मात्र ‘साहो’ ले शुक्रबार मात्र ३७ शो पाएको छ । यता नेपाली चलचित्र ‘मारुनी’ ले भने जम्मा ८ शो पाएको छ ।

यस वर्ष राम्रै चर्चा पाएको चलचित्र ‘मारुनी’ ले धेरै शो नै नपाएपछि फिल्मको व्यापारमा फाइदा पुग्ने सम्भावना न्यून देखिएको छ । अर्कातिर बूकिङ खुला भइसकेका शोमा पनि दर्शकले टिकट काटेका छैनन् । चलचित्र ‘साहो’ का भने धेरै शो बूक भइसकेका छन् ।

यता दरबारमार्गस्थित क्युज हलमा पनि ‘मारुनी’ ले पनि जम्मा एक शो पाएको छ । साहोलाई भने १० शो दिइएको छ । अरु मल्टिप्लेक्स हलमा ‘मारुनी’ को अवस्था चिन्ताजनक भए पनि अफिसमा भने सिङ्गल थिएटरमा सन्तोषजनक व्यापार गर्ने अनुमान गरिएको छ ।

यसैबीच चलचित्र ‘मारुनी’ का निर्देशन नवल नेपालले हलवालाले आफूलाई निमोठेको बताएका छन् । सामाजिक सञ्जालमा उनले लेखेका छन्, ‘मलाई बाले सिकाएनन् कसैको व्यवसायमा हस्तक्षेप गर्न, मलाई आमाले सिकाइनन् कसैको सिर्जनामा आक्रमण गर्न? फेरि पनि मेरो सिर्जना गर्भमै रहँदा किन निमोठिएँ म?’

चलचित्र ‘मारुनी’ मा साम्राज्ञी राज्यलक्ष्मी शाह र पुष्प खड्काको शीर्ष भूमिका रहेको छ । रिलिजअघि भने चलचित्रको राम्रै थियो । यद्यपि ‘बाहुबली २’ बाट चम्केका प्रभासको फिल्म ‘साहो’ ले हल कब्जा गरेको छ ।