काठमाडौं–दाङमा रहेको राप्ती स्वास्थ्य विज्ञान प्रतिष्ठानका रजिष्ट्रार रामप्रसाद प्याकुरेललाई कार्यकक्षमा हातपात भएको छ । प्रतिष्ठान रजिष्ट्रार प्याकुरेललाई एकजना व्यक्तिले हातपात गरेर कार्यकक्षबाट निकालेका हुन् ।

रजिष्ट्रार प्याकुरेललाई दिउँसो २ बजे कार्यकक्षमै हातपात भएको प्रतिष्ठानकी उपकुलपति डा संगिता भण्डारीले खबरहबलाई बताइन् ।
उनले नेकपाका सदस्य विवेक श्रेष्ठले रजिष्ट्रारमाथि हातपात गरी कार्यकक्ष बाहिर निकालेको बताएकी छन् ।

‘एउटा राजनीतिक ग्रुप कार्यलयमा आएको थियो, दाङको पत्रकार महासंघको अध्यक्षको नेतृत्वमा आएको टोली पनि थियो, नेकपाको सदस्य विवेक श्रेष्ठले कार्यलयको रजिष्ट्रारमाथि हातपात गर्नुभएको छ,’ प्रतिष्ठानकी उपकुलपति भण्डारीले खबरहबसँग भनिन्, ‘म त्यो समयमा कार्यलयमा थिइन्, उहाँहरु आएर रजिष्ट्रार माथि हातपात गरेर जानुभयो रे ।’

रजिष्ट्रार प्याकुरेल माथि हातपात भएको सिसिटिभी फुटेज समेत रहेको प्रतिष्ठानकी उपकुलपति भण्डारीले बताइन् ।

प्रतिष्ठानका रजिष्ट्रारमाथि हातपात भएसँगै प्रतिष्ठानले दिउँसो ४ बजे हातपात गर्ने श्रेष्ठ विरुद्ध जिल्ला प्रहरी कार्यलय दाङमा किटानी जायरी दिएको उपकुलपति भण्डारीको भनाइ छ ।

उनले भनिन्, ‘नेकपाका सदस्य विवेक श्रेष्ठले रजिष्ट्रार माथि हातपात गरेको सिसिटिभि फुटेज हामीसँग छ । सोही सिसिटिभी फुटेजकै आधारमा हामीले प्रहरीमा श्रेष्ठ विरुद्ध किटानी जायरी दिएका छौं ।’