लण्डन– बेलायत युरोपेली युनिया ईयूबाट बाहिरिने प्रक्रिया ब्रेक्जिटको मिति नजिकिँदै गरेका बेला बेलायती प्रधानमन्त्री बोरिस जोनसोनले आगामी अक्टोबर १४ सम्मका लागि संसद् निलम्बनको घोषणा गरेका छन् ।

उनले यस विषयमा महारानी एलिजावेथसमक्ष प्रस्ताव गरेको बेलायती सञ्चारमाध्यमले जनाएका छन् । बेलायती प्रधानमन्त्रीको हरेक निर्णयलाई औपचारिकता प्रदान गर्न मात्र महारानी समक्ष प्रस्ताव गरिने भएकाले महारानीले पनि उक्त प्रस्तावलाई स्वीकृत गर्ने बताइएको छ ।

ब्रेक्जिटको मिति आगामी अक्टोबर ३१ मा सकिँदै छ । बेलायत इयूसँग कुनै पनि सम्झौता नगरी बाहिरिने विषयमा प्रधानमन्त्री जोनसन लागिपरेको समाचार सार्वजनिक भइरहेका बेला प्रधानमन्त्रीको जोनसनको अप्रत्याशीत घोषणा आएको हो ।

अर्कोतर्फ प्रधानमन्त्रीको यो कदमबाट सत्तारुरढ पार्टीकै सांसद्हरु पनि चिढिने सम्भावना छ । सांसद्हरुले ब्रेक्जिटका विषयमा संसद्ले आफ्नो लोकतान्त्रिक कार्य गर्न रोक लगाइएको भन्दै चर्को आलोचना गरिरहेका छन् ।