एजेन्सी– भारत भ्रमण सकेर साउदी अरबका युवराज चीन पुगेका छन् । चीनमा उनलाई चिनियाँ कम्युनिष्ट पार्टीका सल्लाहकार तथा राजनीतिक परिषद्का उपाध्यक्ष खि ली फुङ र साउदी अरबका लागि चिनियाँ राजदूत ली हुवा सिनले स्वागत गरे ।

चीन भ्रमणमा रहँदा उनले चिनियाँ राष्ट्रपति सी जिन्पिङ तथा अरु उच्च पदस्थ चिनियाँ अधिकारीसँग भेटवार्ता गर्ने कार्यक्रम छ । उनले चीनमा आपसी लगानी तथा उर्जा तथा प्रविधिका क्षेत्रमा लगानीका विषयमा सम्झौता हुने छ ।

त्यस्तै चीनले साउदी अरबलाई आफ्नो महत्वकांक्षी बेल्ट एण्ड रोड परियोजनामा सहभागी हुन आग्रह गर्ने जनाइएको छ । चीन साउदी अरबको ठूलो व्यापारिक साझेदार हो । गतवर्ष साउदी अरब र चीनबीच ६३ अर्ब डलरभन्दा धेरैको व्यापार भएको थियो ।

दुई वर्षअघि साउदी नरेश सलमान बिन अब्दुलाजिजे चीनको भ्रमण गरेपछि साउदी अरबबाट भएको यो सबैभन्दा उच्चस्तरको चीन भ्रमण हो । युवराज बिन सलमान दुई दिन चीनमा रहनेछन् । गत आइतबारबाट एशिया भ्रमणमा निस्केका उनले यसअघि पाकिस्तान र भारतको भ्रमण पूरा गरिसकेका छन् ।