काठमाडौं– सर्वोच्च अदालतका उपरजिस्ट्रार गोविन्द घिमिरेले नेपाल बार एसोसिएसनका अध्यक्ष गोपालकृष्ण घिमिरेविरुद्ध सर्वोच्चमा दर्ता गरेको अवहेलना मुद्दा फिर्ता लिने बताएका छन् ।

उनले सामाजिक सञ्जाल फेसबुकमार्फत नेपाल बार जनताको आवाज र लोकतन्त्रको हिमायती रहेको उल्लेख गर्दै त्यसको नेतृत्वविरुद्ध आफूले हालेको अवहेलना मुद्दा फिर्ता लिने बताएका हुन् ।

उनले लेखेका छन्, ‘बार जनताको आवाज हो, लोकतन्त्रको हिमायती हो । त्यसको नेतृत्वविरुद्ध मैले अवहेलनामा दिएको प्रतिवेदन फिर्ता लिएको जानकारी गराउँछु ।’

उनले आफू कसैको प्यादा बन्न नचाहेको भन्दै अदालत खुला हुँदा आफ्ना भनाईसहित औपचारिक निवेदन दिने उल्लेख गरेका छन् ।

अध्यक्ष घिमिरेविरुद्ध अदालतको अवहेलना मुद्दाको पेसी कात्तिक १ का लागि तोकिइसकेको छ ।