एजेन्सी – ऋण मिनाहा, भूमि अधिकार, न्यूनतम सहायता मूल्य निर्धारण लगातयतका माग राख्दै भारतको महाराष्ट्रमा किसानहरुले ८ दिन लामो र्याली शुरु गरेका छन् । महाराष्ट्रको नासिकमा र्यालीका लागि भेला भएका दशौँ हजार किसान मुम्बईतर्फ अघि बढेको भारतीय सञ्चारमाध्यमले जनाएका छन् ।
माक्र्सवादी कम्युनिष्ट पार्टीको भातृ संगठन अखिल भारतीय किसान सभाको आह्वानमा र्याली आयोजना गरिएको हो ।
बुधबार किसान र राज्य सरकारबीच भएको वार्ता अनिर्णित बनेपछि बिहीबारबाट र्याली शुरु गरिएको भारतीय सञ्चारमाध्यमले जनाएका छन् ।
पूर्वनिर्धारित कार्यक्रमअनुसार यसअघि बुधबारबाट र्याली शुरु हुने भनिएपनि स्थानीय प्रशासनले र्यालीका लागि अनुमति नदिएको तथा सरकारसँग वार्ता गर्नुपर्ने भएकाले बिहीबारबाट मात्र र्याली शुरु भएको हो ।
तर, बुधबार अबेरसम्म राज्य सरकारका जलश्रोतमन्त्री गिरिश महाजनसँग भएको वार्तामा कुनै निष्कर्ष नसकेपछि स्थानीय प्रशासनको अनुमति बिनै प्रदर्शन गर्नु परेको अखिल भारतीय किसान सभाका अध्यक्ष अशोक धवालेले जनाएका छन् ।
यसअघि गत वर्षको मार्च महिनामा पनि महाराष्ट्रका किसानले यस्तै माग राखेप प्रदर्शन गरेका थिए । त्यतिबेला सरकार र किसानबीच सम्झौता भएपछि प्रदर्शन स्थगित गरिएको थियो ।
तर, सरकारले त्यसबेला गरेको सम्झौता अझै कार्यान्वयनमा नआएकाले प्रदर्शन गर्नुपरेको अखिल भारतीय किसान सभाले जनाएको छ ।
प्रतिक्रिया