काठमाडौं– एघार दिन लामो राष्ट्रसंघीय महासभामा सहभागितापछि सोमबार काठमाडौं उत्रिएका प्रधानमन्त्री केपी शर्मा ओलीले त्रिभुवन विमानस्थलको भीआईपी कक्षमा पत्रकाहरूसँग केही बेर नोकझोंक गरे।

प्रश्नोत्तर सत्रमा पत्रकारहरूले सुरुमै आक्रमक प्रश्न गरे । परराष्ट्रमन्त्रालयका सहसचिव अमृतबहादुर राईले उपलब्धि वर्णन गरिसकेपछिको सवाल-जवाफका क्रममा पत्रकारहरूले नेपालमा यति ठूलो विपत्ति आउँदा पनि किन फर्किन ढिला गरेको भनेर घेर्ने कोसिस गरे ।

त्यसक्रममा उनलाई बाढीपहिरोको विपत्तिपछि राष्ट्रसंघको उपलब्धि सुनाउन आग्रह गर्दा ओलीले आफू भैंसी दुहुन नगएको जवाफ दिए ।

त्रिभुवन विमानस्थलको भीआईपी कक्षमा ओलीसँग पत्रकारहरूले बाढीपहिरोको विपत्तिबारे दुई प्रश्न गरे ।

–चौतर्फी रुपमा विपद्को बेला सरकारको भूमिका देखिएन अथवा भनौँ लज्जास्पद भूमिका रह्यो भन्ने छ के भन्न चाहनुहुन्छ ?

विरोधका लागि विरोध होला । सरकारले गर्नेसम्मको प्रयास तत्काल मिटिङहरू बसेर, तत्काल सेना-प्रहरी खटाएर उद्धार कार्यहरू गरेको छ । अब बाढी आउने कुरालाई त रोक्न सकिँदैनथ्यो । उद्धार गर्ने कुरा हो, राहत पुर्‍याउने कुरा हो ।

र, पहिरो जाने कुरा पनि पूर्वसूचना गरेर जाँदैन । पहिरो गएपछि क्षति पुर्‍याउने नै भयो । त्यसमा सरकारले तदारुकताका साथ उद्धार कार्य, रारहत कार्य पुर्‍याउने हो ।

त्यो काम सरकारले पुर्‍याएको छ भन्ने मलाई लाग्छ । मैले बाहिर हुँदा पनि यस विषयमा जानकारी लिइरोखको छु । र, आफ्नो मातहतका साथीभाइहरूलाई, निकायहरूलाई पनि निर्देश गरिराखेको छु ।

मैले पाएको जानकारी अनुसार आफ्नो बलबुताअनुसार सरकार र यसका निकायले काम गरेका छन् । विरोधका लागि विरोध गर्ने परिपाटी राम्रो होइन । यस्तो संवेदनशील बेलामा हामी सबै मिलेर यथार्थपरक ढंगले चल्नु वाञ्छनीय हुन्छ । न कि विरोध गर्नका लागि विरोध गर्ने खालको स्थिति राम्रो हुँदैन भन्ने लाग्छ मलाई ।

–तपाईं आइसकनु भयो । अब के हुन्छ सरकारको भूमिका ?

अझ प्रभावकारी ढंगले उद्धारका कामहरू, राहतका कामहरू, पुनर्निमाणका कामहरू अगाडि बढ्छन् ।