काठमाडौं- एघार दिन लामो राष्ट्रसंघीय महासभाको सहभागितापछि सोमबार काठमाडौं उत्रिएका प्रधानमन्त्री केपी शर्मा ओलीसँग पत्रकाहरूको हल्का नोकझोंक चलेको छ।

परराष्ट्र मन्त्रालयका सहसचिव अमृतबहादुर राईले ११ दिने राष्ट्रसंघ यात्राको उपलब्धि स-विस्तार वर्णन गरेपछि ओलीसँग पत्रकारको सवाल-जवाफ कार्यक्रम त्रिभुवन विमानस्थलको भीआईपी कक्षमा राखिएको थियो ।

त्यसक्रममा पत्रकारहरूले राष्ट्रसंघ भ्रमण र भारतीय प्रधानमन्त्री नरेन्द्र मोदीसँगको भेटको उपलब्धिबारे विशेष चासो राखे ।

ओलीले मोदीसँगको भेटबारे अनुमान गरेअनुसारकै जवाफ दिँदै भने, ‘मोदीसँग दुई देशबीचका सम्बन्धलाई प्रगाढ र बलियो बनाउने कुरा भएको छ।’

त्यसपछि पत्रकारले राष्ट्रसंघबाट के के उपलब्धि गरेर आउनु भयो भनेर ओलीलाई सोधे । त्यसमा भने ओली केही रिसाए जस्तो देखिए । उनले राष्ट्र संघमा आफूले नेपाल जस्ता देशकोतर्फबाट प्रष्टसँग कुरा राखेको सुनाए ।

उपलब्धिका सन्दर्भमा भने ओलीले पत्रकारहरूसँग रिसाएको शैलीमा जवाफ दिँदै भने, ‘म भैंसी दुहुन गएको होइन, दूध लिएर आएँ भन्नलाई । मैले राष्ट्रसंघमा हाम्रा विचार राख्न पाएँ । हाम्रो देशको मात्रै समस्या होइन, पछिल्लो समय विश्वमा देखिएका समस्या सबै मिलेर समाधान गरौँ भन्ने कुरा पनि राखेँ ।’