काठमाडौं- साथीलाई बचाउन जाँदा नेपाली सेनाका एकजना कर्णेलले ज्यान गुमाएका छन् ।

रिसोर्टमा सुतिरहेका बेला पहिरोमा पुरिएका साथीलाई उद्धार गर्न जाँदा नेपाली सेनाका प्रमुख सेनानी (कर्णेल) ३६ वर्षीय मिलन केसीले ज्यान गुमाएका हुन् ।

सिन्धुपाल्चोकको सुनकोशी गाउँपालिका-४ चियानेस्थित सिन्धु बीच रिसोर्टलाई पहिरोले पुरेपछि उद्धार गर्न जुट्दा केसीको शनिबार निधन भएको हो ।

नेपाली सेनाको भक्तपुर खरिपाटीस्थित सैनिक प्रतिष्ठानमा कार्यरत केसी दोलखाको भीमेश्वर नगरपालिकाका बासिन्दा थिए ।

उनी दुईजना कोरियन नागरिकसहित शुक्रबार राति सिन्धु बीच रिसोर्टमा बास बस्न पुगेका थिए । जसमा एकजना कोरियनले ज्यान गुमाएका छन् भने अर्का बेपत्ता भएका छन् । उनीहरूका गाडी चालकको पनि केसीसँगै ज्यान गएको छ ।

तर शनिबार पहिरो झरेपछि कर्णेल केसीसहितको टोली त्यहाँबाट निस्केको थियो । आफू निस्किए पनि रिसोर्टमा रहेका कोरियन नागरिकलाई उद्धारका लागि उनी फेरि त्यहाँ पुगेका थिए ।

जिल्ला प्रहरी कार्यालय सिन्धुपाल्चोकका प्रमुख एसपी सन्तोष खड्काका अनुसार कोरियनलाई बचाउन पुगेका केसीलाई रिसोर्टमा त्यही बेला खसेको ठूलो पहिरोले पुरेको हो ।

पहिरोमा पुरिएका उनी चोट लागेर घाइते भएका थिए । त्यसपछि उनलाई उद्धार गरेर निकालिएको थियो । उनी पहिरोस्थलबाट आफैं हिँडेर निस्किए पनि केही बेरमै ढल्न पुगेको खुलेको छ ।

कर्णेलमा बढुवा भएका केसीले फूली लगाएर जिम्मेवारी सम्हाल्न बाँकी नै थियो । सेनाका अनुसार केसी संयुक्त राष्ट्रसंघीय मिशनअन्तर्गत सिरिया जानुपर्ने तयारीमा थिए ।

सिन्धु बीच रिसोर्टको पहिरोमा परेर उनीसँगै गएका एकजना कोरियन पर्यटक पनि परेका छन् । उनीहरू दुवैजनाको शव बाह्रबिसे प्राथमिक स्वास्थ केन्द्र लगेर काठमाडौं पठाइएको एसपी खड्काले बताए ।