काठमाडौं – पछिल्लो तीन घण्टामा नवलपरासी (बर्दघाट सुस्ता पूर्व)मा भारी वर्षा मापन गरिएको छ । डण्डा, दुम्कौली, देउराली नवल र आसपास भारी बर्षा मापन भएको जल तथा मौसम विज्ञान विभागले जनाएको छ ।

उक्त क्षेत्रमा राति थप वर्षा हुने सम्भावना रहेको विभागले जनाएको छ । साथै सो क्षेत्र भइ बहने बिनाई खोला, अरुङ्ग खोला र अन्य साना नदीहरुमा बाढीको जोखिम रहेकोले नदी तटिय क्षेत्रका बासिन्दालाई भोलि दिउँसोसम्म उच्च सतर्कता अपनाउन विभागले आग्रह गरेको छ ।

यस्तै सिन्धुलीमा पनि भारी वर्षा भइरहेको छ । जसका कारण कमला नदीले जलसतह सतर्कता तह पार गरेको विभागले जनाएको छ । सो क्षेत्रमा थप बर्षाको पूर्वानुमान रहेकोले खतरा तह पार गर्ने पूर्वानुमान रहेको छ । कमला नदी तटीय क्षेत्रका बासिन्दालाई पनि भोलि दिउँसो सम्मै उच्च सतर्कता अपनाउन आग्रह गरिएको छ ।

शुक्रबार बिहानैदेखि देशका अधिकाशं स्थानमा लगातार वर्षा भइरहेको छ । देशभर मनसुनी वायुको प्रभाव रहनुकासाथै भारतको उत्तर मध्य महाराष्ट्र र आसपासका क्षेत्रमा रहेको न्यून चापीय प्रणालीको प्रभाव पनि परेको बताउँदै जल तथा मौसम विज्ञान विभागले मुलुकका अधिकांश भागमा साधारणतया बदलीदेखि पूर्णतया बदली रहेको जनाएको छ । राति पनि देशभर नै पानी पर्ने सम्भावना छ ।