काठमाडौं- नेकपा माओवादी केन्द्रका अध्यक्ष पुष्पकमल दाहाल प्रचण्डले आफूले सरकारको नेतृत्व गर्दा जनताका कयौँ काम गरेको बताएका छन् ।

बिहीबार काठमाडौंको कीर्तिपुरमा पार्टीनिकट विद्यार्थी संगठन अखिल क्रान्तिकारीको २३औँ राष्ट्रिय सम्मेलन उद्घाटन गर्दै उनले आफू सरकारमा रहँदा दलाल पूँजीपतिहरूको राइँदाइँमाथि जेहाद छेडेको उल्लेख गरे ।

सदन र सडकबाट केही महिनाभित्रै परिस्थिति उल्ट्याइदिन सकिने पनि उनले बताए ।

‘हामी अहिले सरकार बनाउने हतारोमा छैनौँ । तिमीहरू मिलेर बस भनेका छौं तर हामीले चाहँदैमा उनीहरु मिल्दैनन् । अपवित्र गठबन्धन चाँडै कुहिएर झर्छ’, उनले भने ।

विरोधीहरूले सधैँ षड्यन्त्र गर्ने र त्यसको प्रतिवाद गर्नु क्रान्तिकारीहरूको दायित्व हुने अध्यक्ष प्रचण्डले बताए ।

सरकारबाट निक्लिँदै गर्दा कार्यकताहरू सडकको बाघ र आफू प्रतिनिधिसभाको सिंह भएको उनले बताएका छन् ।

त्यस्तै प्रचण्डले जनयुद्धदेखि शान्ति प्रक्रियामा आएपछि पनि कहीँ न कहीँ घेरा हालेर माओवादी आन्दोलनलाई सिद्धाउने षडयन्त्र हुँदै आएको बताए ।

ठूला दलहरू मिलेर अहिलेसम्मको उपलब्धि उल्टाउने प्रयास भइरहेकाले सडकबाट प्रतिक्रियावादीलाई झुकाउने उनले बताए ।

उनले समाजवादी मोर्चा र कम्युनिष्ट आन्दोलनलाई बलियो बनाउने र प्रतिक्रियावादी शक्ति परास्त गर्ने अभियानमा रहेको बताए । केही समयभित्रै एकता र मोर्चाको नयाँ समाचार सुन्न पाउने उनले बताएका छन् ।